Allar fréttir

Það er gott að komast út undir bert loft þegar vel viðrar. Aðstandendur eru duglegir að bjóða fólkinu sínu í göngutúra og alltaf hægt, nú þegar haustar, að fá lánuð teppi í hjólastól ef heimilismaður þarf á að halda. Það er stutt í ísbúðina á Hagamel, á kaffihús, á svæðið vð Landakot og sumir arka niður að tjörn eða jafnvel niður að sjó. En stundum er líka bara gott að viðra sig í portinu hér á Grund og það gerðu heimilismenn um daginn þegar bocciatíminn var fluttur þangað.

Félag fyrrum þjónandi presta sá um messuhald á Grund síðastliðinn sunnudag. Sr. Auður Eir Vilhjálmsdóttir predikaði og sr. Jón Þorsteinsson og sr. Kristján Valur Ingólfsson þjónuðu fyrir altari í tilefni af 50 ára vígsluafmæli þeirra. Félagar úr Grundarkórnum leiddu söng undir stjórn Kristínar Waage organista.

Verslun Grundar hefur nú verið flutt að nýja kaffihúsinu og er hún opin alla virka daga frá klukkan 12.30-15.30 eða þar til kaffihúsið verður opnað. Kaffihúsið er í raun tilbúið en þessar vikurnar standa yfir leyfisveitingar og lokaúttektir og er beðið eftir að öll tilskilin leyfi séu komin. Vonandi á næstu vikum. Það ríkir mikil eftirvænting meðal allra hér í húsinu og aðstandendur hafa einnig sýnt kaffihúsinu áhuga svo það verður gaman þegar loksins verður hægt að opna dyrnar fyrir kaffihúsagestum. Á meðfylgjandi mynd er fyrsti viðskiptavinurinn, starfsmaðurinn Rúnar, að kaupa sér orkudrykk hjá henni Rut í nýja verslunarhúsnæðinu.

Það lögðu allir sitt af mörkum dagana fyrir Blómstrandi daga hér í Ási og föndruðu og skreyttu. Útkoman var skemmtileg og litrík. Kærar þakkir til allra sem lögðu leið sína í Ás á Blómstrandi dögum.

Á mánudögum er boðið upp á gönguferðir hér í Ási og að þessu sinni var gengið á grasi. Blómin voru dásömuð, trén föðmuð og svo rætt um náttúruna og hamingjuna sem felst að geta verið innan um gróðurinn.

Við fengum góða heimsókn til okkar í Mörk á dögunum. Það voru þær Vigdís Erla Davíðsdóttir píanóleikari og Hildur Luo Káradóttir gíarleikari sem buðu upp á tónleika., píanó og gítarleik. Dásamlegur tvíleikur sem þær buðu heimilismönnum að hlýða á. Takk kærlega fyrir þessa frábæru tónleika

Það var rigningarsúld nokkra daga í síðustu viku hér í Ási og þá var ákveðið að baka bara vöfflur og hafa það notalegt inni. Heimilisfólkið bakaði vöfflur eins og enginn væri morgundagurinn og margir runnu á lyktina og þáðu rjúkandi heitar vöfflur með sultu og rjóma. Síðan var bara púslað, prjónað og spjallað.

Það er hefð komin fyrir því að heimilin í Mörk keppi um fallegustu svalirnar. Síðustu vikurnar hafa starfsmenn og heimilismenn undirbúið svalirnar, sett niður sumarblóm í potta, ker og körfur og skreytt hátt og lágt. Sjálfan daginn þegar dómnefndin gekk um húsið var öllu til tjaldað. Dómnefndin átti erfitt verk fyrirhöndum en niðurstaðan var að Álfheimar fengu gullverðlaun, silfur kom í hlut Ljósheima og Miðbær fékk bronsverðlaunin

Söngkonan Hafdís Huld heimsótti okkur í morgunstund í gær og sagði heimilisfólkinu frá sér og söng nokkur lög. Við þökkum henni kærlega fyrir komuna. Sr. Pétur Þorsteinsson, sá sem stendur við gluggann á myndinni, er sá sem í viku hverri fær til okkar fólk í sjálfboðavinnu sem kemur og gleður heimilisfólkið okkar á einn eða annan hátt með einsöng, kórsöng, hljóðfæraleik, upplestri, dansi, fræðslu eða hugleiðslu svo dæmi séu tekin. Dásamlegt að finna hvað fólk er tilbúið að koma og gefa vinnu sína við að gleðja heimilisfólkið og veita því tilbreytingu.

Þegar veðrið leikur við okkur eins og um helgina eru svalirnar frábær staður til að njóta sólar. Ekki skemmir fyrir að geta notið litskrúðugu blómanna sem prýða nú potta og ker á svölum heimilanna hér í Mörk. Í ár ræktuðum við í gróðurhúsunum okkar í Ási um 11.000 sumarblóm sem prýða nú svalir og garða Grundarheimilanna og Íbúða 60+.