Allar fréttir

Séu hendur heimilismanna lúnar og þurrar þá er boðið upp á handavex í vinnustofu Grundar og hitadekur. Á eftir er bara að skella sér í kúlustólinn og finna hlýjan faðm stólsins umvefja sig

Það eru Grundarheimilin sem byggja hjúkrunarheimilið og leigja ríkinu með leigusamningi til 20 ára. Grund hefur rekið Ás frá árinu 1952 og sinnt öldrunarþjónustu í Hveragerði og nágrenni í yfir sjötíu ár. Það voru Inga Sæland, félags- og húsnæðismálaráðherra, Birna Sif Atladóttir, framkvæmdastjóri hjúkrunar í Ási, og Grétar Aðalsteinsson, heimilismaður í Ási, sem tóku skóflustungu að nýja heimilinu sem mun rúma 44 manns. Í dag eru heimilismenn í Ási 111 talsins en verða 138 þegar nýja hjúkrunarheimilið verður tekið í notkun. Til að koma byggingunni fyrir þarf að fjarlægja nokkur minni hús á staðnum með eldri rýmum og sameiginlegum baðherbergjum. Öll herbergin á nýja hjúkrunarheimilinu verða einbýli með baðherbergjum. Byggingin verður 2.680 fermetrar og heildarkostnaður um 2,8 milljarðar króna. „Það er mér sönn ánægja að taka fyrstu skóflustunguna að nýju hjúkrunarheimili í því ágæta sveitarfélagi Hveragerði. Þessi framkvæmd bæði fjölgar hjúkrunarrýmum og leysir af hólmi eldri rými sem voru komin til ára sinna. Ég óska Hvergerðingum innilega til hamingju með þetta og við munum halda áfram á sömu braut á landsvísu eins og ríkisstjórnin hefur lofað,“ sagði Inga Sæland, félags- og húsnæðismálaráðherra. „Þessi framkvæmd er mjög mikilvæg til að koma til móts við breyttar og auknar þarfir og kröfur þeirra sem dvelja nú og munu dvelja framvegis á hjúkrunarheimilum landsins. Allir verða með sitt eigið herbergi og sér baðherbergi. Húsið samanstendur af fjórum 11 manna einningum og er skjólsæll garður á milli austureininganna annars vegar og einnig á milli vestureininganna. Aðalinngangur er í miðju og tengjast einingarnar fjórar um gang að norðanverðu þar sem einnig verða ýmis stoðrými. Við á Grundarheimilunum erum afar þakklát félags- og húsnæðismálaráðherra að treysta okkur fyrir þessu góða verkefni,“ sagði Gísli Páll Pálsson, stjórnarformaður Grundarheimilanna. „Starfsemin í Ási er ein af perlum bæjarins og er sannarlega hluti af einstökum gæðum Hveragerðis. Nýtt hjúkrunarheimili er hluti af metnaðarfullri framtíðarvegferð Áss, sögulegri uppbyggingu Hveragerðisbæjar og mun auka við gæði og velferð í bæjarfélaginu,“ sagði Pétur Georg Markan, bæjarstjóri í Hveragerði.

Það er orðið páskalegt um að litast hér hjá okkur á Grund enda komu þessi mektarhjón með tugi blóma úr Hveragerði sem prýða nú heimilið. Að auki eru páskalegar uppákomur daglegt brauð þessa dagana, páskaeggjabingó, páskaföndur og svo eru heilu stæðurnar af páskaeggjum komnar í hús.

Það er algengt að kisur geri sig heimakomnar á Grund. Á síðasta stjórnarfundi heimilisins linnti þessi fallega kisa ekki látum fyrr en hún komst inn á fundinn. Hún lagði ekki mikið til málanna en hlustaði með eyrun vel sperrt. Þegar sækja átti mjólk fyrir þennan óvænta gest ákvað hann að hoppa upp í gluggakistuna á ný og halda för sinni áfram þar sem hann fengi kannski eitthvað meira krassandi til að hlusta á og ef til vill rjóma til að lepja.

Á ári hverju mæta nemendur úr Kvennaskólanum hingað á Grund þegar það er peysufatadagur hjá þeim. Þvílík gleði þegar allur hópurinn kemur í portið á Grund og dansar og syngur. Takk kæru nemendur fyrir skemmtunina og takk kæru forráðamenn Kvennaskólans fyrir að muna eftir fólkinu okkar ár eftir ár

Eins og margir vita búa Kókó og Kíki á Grund. Parið fékk nýtt og stærra búr á dögunum og skömmu síðar voru komin egg í litla kassann sem er áfastur búrinu. Nú hafa tveir ungar litið dagsins ljós og mikil lukka meðal heimlisfólks að fylgjast með þessari litlu fjölskyldu. Það er dekrað við þau með sérfæði og þeir sem kíkja í heimsókn passa að það séu engin læti. Reyndar er Kókó kominn í frí langþráð frí frá Kíkí sem hafði gert honum lífið leitt um skeið. En þau eru í sama herberginu, þurftu bara hvíld frá hvort öðru um sinn. Það gerist á bestu bæjum.

Heimilisfólkið í sjúkraþjálfun Áss fylgdist vel með á skjá þegar gosið hófst á Reykjanesskaga í morgun. Allir engu að síður önnum kafnir við að gera æfingar á þessum þriðjudagsmorgni. 😍 Í lokin er svo boðið upp á heita bakstra fyrir stífar axlir. Já það er ekki amalegt að búa í Ási

Hnoðri, sem býr í Bæjarási, veit að það er hlýtt og notalegt að kúra á teppinu hjá henni Sóleyju og líklega elskar hún líka að hafa kisu hjá sér. Ljúft að byrja daginn svona

Það þarf ekki mikið til að laða fram bros á varir heimilisfólks á Litlu og Minni Grund. Tófú er heimilisvinur og honum finnst ekki leiðinlegt að leika sér með afgangsgarn. Hann lifir líka eins og blóm í eggi þegar hann kemur á Grund, fær næga athygli og strokur ef hann vill og jafnvel eitthvað að lepja.

Þeir sem búa á Grund og þeir sem eiga leið framhjá þessari fallegu byggingu við Hringbraut hafa tekið eftir að síðustu ár hafa staðið yfir gluggaskipti á heimilinu. Hátt í þrjú hundruð gluggar eru á byggingunni og nú fer að síga á seinni hlutann með þessar framkvæmdir. Vonandi verður búið að skipta um alla gluggana á árinu.