Allar fréttir

Guðrún Birna Gísladóttir, fv. forstjóri hjúkrunarheimilisins Grundar, lést 20. október, 82 ára að aldri. Guðrún fæddist á Grund við Hringbraut 1. júlí 1944. Foreldrar hennar voru Gísli Sigurbjörnsson forstjóri Grundar og Helga Björnsdóttir. Guðrún varð þriðji ættliðurinn til að stýra Grund, en afi hennar, sr. Sigurbjörn Ástvaldur Gíslason, var á meðal stofnenda heimilisins. Guðrún ólst upp á Grund með heimilisfólkinu og upplifði vöxt og viðgang starfseminnar. Árið 1965 giftist Guðrún sr. Páli Þórðarsyni og áttu þau þrjá syni; Gísla Pál, f. 1966, Þórð Björn, f. 1967, og Halldór Gunnar, f. 1975. Þau bjuggu í Neskaupstað frá 1973 en snjóflóðið i bænum 1974 var þeim mikið áfall líkt og samfélaginu öllu. Þau fluttu til Njarðvíkur 1975 er Páll varð þar sóknarprestur. Páll lést 1978, langt um aldur fram. Eftirlifandi eiginmaður Guðrúnar er Júlíus G. Rafnsson, fv. framkvæmdastjóri á Grund, og sonur þeirra er Kjartan Örn, f. 1982. Guðrún starfaði lengi við hlið föður síns á Grund. Hún sat í stjórn heimilisins frá 1979 og tók við starfi forstjóra við andlát föður síns í ársbyrjun 1994. Var hún fyrsta konan hér á landi til að gegna forstjórastarfi á hjúkrunarheimili. Undir hennar stjórn stækkaði starfsemin til muna; byggt var við Grund, Hjúkrunarheimilið Ás var vígt 1998, rekstur Markar hófst 2010 og reistar voru þjónustuíbúðir fyrir aldraða. Guðrún lét af störfum á 75 ára afmælisdegi sínum, 1. júlí 2019, eftir 52 ára starf á Grund. Sat hún í stjórn heimilisins til dánardags, átti sinn síðasta stjórnarfund daginn fyrir andlátið. Guðrún var sæmd riddarakrossi hinnar íslensku fálkaorðu á Bessastöðum 17. júní 2023, fyrir umönnun og þjónustu við aldraða. Hún hlaut þakkarviðurkenningu Félags kvenna í atvinnurekstri árið 2009.

Árlega fögnum við afmæli heimilisins hér á Grund og í ár eru 104 ár síðan Grund var formlega vígð í litlu húsi við Sauðagerðistún, þann 29. október árið 1922. Afmælishátíðin hér á Grund tók tvo daga, hátíðasalurinn var klæddur í sparibúning og boðið upp á heitt súkkulaði og bakkelsi. 🎂 Forstjóri Grundarheimilanna, Karl Óttar Einarsson, flutti ávörp báða dagana, Grundarkórinn söng og leiddi einnig samsöng. Rúsínan í pylsuendanum var svo heimsókn Stefáns Helga Stefánssonar tenórs sem brá ser í líki Ragga Bjarna og svo Elvis.🥰

Grundarbandið mætti í hátíðasalinn í síðustu viku og lék að venju fyrir dansi. Heimilisfólk og starfsfólk skemmtu sér vel og það er rétt að minna á að aðstandendur eru líka alltaf hjartanlega velkomnir á viðburði eins og þessa. 🥰 Þetta er svo skemmtilegt og eflaust frábært að stíga dans með sínu fólki við dunandi harmonikkutóna Grundarbandsins. 🕺

Sönghópurinn Tjaldur kom hingað í Ás í síðustu viku. Það er alltaf tilhlökkunrefni þegar þessi notalegi sönghópur kemur í heimsókn. Ekki nóg með að hópurinn syngi létt og skemmtileg lög heldur nær hann líka að hrífa heimilisfólkið með og það er svo dásamlegt.

Það var svo sannarlega haldið upp á Bleika daginn í Ási í gær. Allt skreytt hátt og lágt af heimilisfólki og starfsfólki og Guðrún Lilja Jóhannsdóttir, Eyrún Samúelsdóttir og Hólmfríður Kristjánsdóttir prjónuðu og hekuðu slaufur og bönd handa þeim sem vildu bera og sýna með því stuðning. 🩷 En það var ekki nóg með að allt væri skreytt og fólk skartaði bleiku heldur voru líka bleikar kökur á boðstólum með kaffinu og nýbakaðar vöfflur með bleikum rjóma. Dásamlegur dagur og allir svo glaðir bæði með tilbreytinguna og svo hinsvegar að fá að sýna þessu átaki Krabbameinsfélags Íslands og Bleiku slaufunnar stuðning

Eden tenglar í Ási tóku að sér að skipuleggja haustferð fyrir heimilisfólk. Farið var á Lava safnið á Hvolsvelli þar sem gengið var um safnið með leiðsögn. Komið var við á kaffihúsinu Auðkúlu og þar var boðið upp á vöfflur og kaffisopa. Þetta var dásamleg ferð og allir sem nutu sín.🥰 Sigrún Sveinsdóttir var með myndavélina á lofti.

Það er eins og flestir vita líklega bleikur dagur í dag, vitundardagur á vegum Bleiku slaufunnar og Krabbameinsfélags Íslands. 🌸🌷 Á þriðju hæðinni í Mörk var ákveðið að minna rækilega á málstaðinn og allt skreytt hátt og lágt. Að auki var boðið upp á bleikar veitingar og svo klæddust flestir einhverju bleiku. Frábær tilbreyting og allir sem vettlingi geta valdið tóku þátt í þessari skemmtilegu uppákomu.

Í gær fengum við skemmtilega heimsókn upp á aðra hæð hér í Mörk. Fjórir nemendur úr Verslunarskóla Íslands komu til okkar en þar stendur yfir góðgerðarvika. ❤️ Ungmennin eru á fyrsta ári í Versló og buðu upp á stólajóga og spiluðu síðan OlsenOlsen. Frábær stund og allir ánægðir með þessa notalegu og skemmtilegu tilbreytingu. 🥰 Í dag eigum við von á öðrum hópi frá Versló sem ætlar að mæta í morgunstund á fjórðu hæð

Grundarkórinn hefur verið starfræktur í mörg ár en hann skipa heimilismenn, starfsfólk, aðstandendur og velunnarar heimilisins. Kórinn hittist vikulega á æfingum og kemur fram við hátíðleg tækifæri og heldur einnig tónleika tvisvar á ári. Kóræfingar eru komnar á fullt eftir sumarfrí en þær eru alla miðvikudaga. Kórstjóri er Kristín Waage.

Það er góðgerðarvika hjá Verslunarskóla Íslands þessa dagana og nemendur komu á Grund til að láta gott af sér leiða. 🥰 Þeir komu færandi hendi með bakkelsi, sungu og fóru í leiki með heimilisfólki og lífguðu svo sannarlega upp á hversdaginn hér hjá okkur á Litlu Grund. Takk kærlega fyrir skemmtilega heimsókn