Fréttir

Það var fjör á hattaballi Grundar á öskudag. Allir sem vettlingi gátu valdið skörtuðu skrautlegum höfuðfötum og sumir fóru meira að segja í búning til að lífga upp á tilveruna. Við erum svo heppin hér á Grund að eiga orðið myndarlegt safn af höttum sem við lánum þeim heimlismönnum og starfsfólki sem ekki á. Hið vinsæla Grundarband lék fyrir dansi en harmonikkuleikararnir koma til okkar í sjálfboðavinnu í hverjum mánuði og gleðja okkur með harmonikkuleik.

Í tilefni konudags í gær fengu allar heimiliskonur á Grundarheimilunum rós að gjöf. 🥰 Tæplega þrjú hundruð rósir sem heimiliskonur fengu eru gjöf frá Ræktunarstöðinni í Hveragerði og að sögn Jóhanns Ísleifssonar blómabónda var ljúft að geta glatt heimiliskonurnar með þessari rósasendingu. Í fyrra gáfu þeir líka rósir á heimilin á konudaginn. Grundarheimilin þakka Ræktunarstöðinni fyrir þessa hlýju og fallegu gjöf.🌹

Það standa yfir heilsudagar á Grund þessa dagana. Heimilisfólkið hefur tekið þátt í ýmsum óhefðbundnum æfingum og haft gaman af. Hér eru það blöðrur sem gegna lykilhlutverki og eitthvað koma líka gosflöskur við

Í næstu viku er Lífshlaupsvika á Grund og þessa dagana er verið að undirbúa hana. Heimiliskonur á Litlu og Minni Grund máluðu plastflöskur í gríð og erg nú í vikunni. Þær verða svo fylltar af hráum hrísgrjónum, þeim stillt upp og farið í keilu með þær. Endurnýta og hreyfa sig.

Það var notalegt að sjá börnin koma stormandi inn í hlýjuna á Litlu Grund en nemendur úr 3. bekk Landakotsskóla komu í heimsókn í vikunni og spjölluðu við og sungu fyrir heimilisfólkið. Svona ljúfar heimsóknir eru gefandi fyrir alla því heimilisfólkið nýtur þess að fá að spjalla og hlusta á ungviðið og það kynnist heimilinu og þeim sem þar búa. Grund er áberandi bygging í vesturbænum ogþað er frábært fyrir börnin að vita hvað er í þessu stóra húsi sem þau kannski fara framhjá daglega. Þetta eru notalegar samverustundir.

Við vekjum athygli á því að nú hefur kaffihúsið Kaffi Grund verið opnað. Það er nú opið alla daga vikunnar frá klukkan 13:00 til 17:00. Gestir geta keypt smurt brauð og kökur, kaffi og gosdrykki en enn er þó beðið eftir vínveitingaleyfi og því ekki að svo stöddu hægt að kaupa sér léttvínsglas eða bjór. Vekjum athygli á fallegu listaverki við kaffihúsið sem er eftir Helga Gíslason myndhöggvara. Í sumar á eftir að vera notalegt að sitja í suðurgarðinum og njóta sólar og skjóls. Gengið er inn um aðalinngang bakvið Grund og allir hjartanlega velkomnir

Það var haldin þrettándagleði í hátíðasal Grundar í gær. Grundarbandið mætti með harmonikkurnar og lék fyrir dansi i kringum jólatréð. Hjördís Geirsdóttir, söngkona, mætti með gítar og leiddi sönginn. Virkilega ljúf og notaleg stund.

Snemma í gærmorgun gerðust undur og stórmerki á Grund. Litli unginn sem Grundarparið Kókó og Kíkí eignuðust fyrir nokkrum vikum kom út úr kassanum. Heimilisfólk og starfsfólk hefur fylgst með unganum og beðið með eftirvæntngu að hann léti sjá sig frammi i búrinu en undanfarið hefur hann verið að stinga höfðinu út um gatið á kassanum sem er áfastur búrinu. Í gær kom hann semsagt fram og foreldrarnir hafa verið að bera í hann æti. Hann er líkur pabba sínum, blár en eins og sést á einni myndinni er móðirin fagurgræn. Ekki er vitað um kynið ennþá

Undanfarin ár hefur verið efnt til skemmtilegrar samkeppni á Grundarheimilunum um flottasta piparkökuhúsið. Ekki endilega bara það hús sem er fallegast heldur tekið mið af allskonar þáttum eins og samvinnu heimilisfólks og starfsfólks, móttökum þegar dómnefnd mætti, veitingum og frumleika. Það ríkti eftirvænting þegar dómnefndin fór um Grundarheimilin og á öllum heimilum var henni tekið fagnandi. Peningaverðlaun voru veitt fyrir efstu þrjú sætin á öllum heimilunum þremur. Sjá fleiri myndir af húsunum á facebook síðum heimilanna.