Grundarheimilin

Alla miðvikudaga klukkan frá 14:00 til 15:00 eru æfingar hjá Grundarkórnum í hátíðasal Grundar. Kórinn skipa heimilismenn, starsfólk og einnig eru aðstandendur hjartanlega velkomnir sem og aðrir velunnarar. Í gær voru það jólalögin sem ómuðu úr hátíðasalnum.

Það var fremur kalt og hráslagalegt veður í gær og því var ákveðið að bjóða upp á nýbakaðar vöfflur í vinnustofunni í gær. 🧇☕️ Heimilisfólk kemur iðulega í vinnustofuna til að prjóna, mála, leysa krossgátur, perla eða bara til að spjalla og þiggja heita bakstra á axlir.

Gísli Páll Pálsson björgunarmaður í Hjálparsveit skáta í Hveragerði kom við í Ási með neyðarkallinn. Karl Óttar Einarsson forstjóri tók við neyðarkallinum en Ás hefur til fjölda ára styrkt hjálparsveitina með því að kaupa neyðarkallinn

Á þriðjudögum er heimilisfólki boðið í vaxmeðferð í vinnustofu iðjuþjálfunar í Mörk. Þegar fólkið okkar hefur fengið vaxmeðferð á hendur, smá nudd jafnvel á lúna fingur og hitapoka á axlir fer heimilisfólkið að bjástra við verkefni sem heilla það. Einhverjir kjósa að föndra fyrir jólin, aðrir reyna sig við orðarugl eða krossgátur og svo eru alltaf einhverjir sem kjósa að vinna með demantaperl.

Það eru tólf ár síðan Iceland Airwaves tónlistarhátíðin var fyrst sett á Grund, 5 nóvember árið 2014. Þá söng Júníus Meyvant fyrir fullum sal af fólki. Nú tólf árum síðar var það Halla Tómasdóttir, forseti Íslands sem setti tónlistarhátíðina formlega hér á Grund. Í opnunarávarpi sínu sagði Halla meðal annars að hún væri efins um að nokkur tónlistarhátíð hefjist með þeim hætti sem hér væri gert, þar sem yngstu börnin til elstu borgara og fjöldi erlendra gesta koma saman þvert á kynslóðir og njóta tónlistar saman. "Ég held að tónlist hafi einstaka töfra og ég finn það í mínu starfi hvað tónlistaratburðir gera mikið fyrir mig í mínu starfi. Stundum er starfið strembið en svo fer maður á tónleika og tónlistin hefur einhverja einstaka töfra,“ sagði Halla. Að venju var troðfullur hátíðasalurinn hér á Grund, leikskólabörn úr hverfinu mættu, heimilisfólk og gestir hátíðarinnar. Eins og alltaf á hverju ári dásamleg stemning, í raun alveg einstök.

Árlega koma krakkar úr Grunnskóla Hveragerðis til okkar hingað í Ás með vinakveðju sem þau hafa búið til í tilefni vinaviku grunnskólans. Verkefnið er hluti af áherslu skólans um virðingu, vináttu og jákvæð samskipti. Unnið er með vinabekki þar sem nemendur úr mismunandi árgöngum starfa saman. Börnin fara síðan ì öll fyrirtæki og hús og bera út kveðjurnar