Ás | Grundarheimilin

Fjólublár bekkur og alzheimer

Fri, 27 Mar 2026 08:07:00 +0000

Í vikunni var von á fulltrúum Alheimersamtakanna í Ás þar sem fyrirhugað var að bjóða upp á fræðslu fyrir starfsfólk um heilabilun. Af þessu tilefni var ákveðið að leita á náðir herramanna í trésmiðjunni hér hjá okkur og þeir beðnir um að gefa gömlum bekk nýtt líf. Bekkurinn var málaður fjólublár en það er litur Alzheimer sjúkdómsins og annarra heilabilunarsjúkdóma. Alzheimersamtökin hafa unnið að vitundarvakningu um Alzheimer og er átakið Munum leiðina einn liður í henni. Það felst í því að koma upp fjólubláum bekkjum í sveitarfélögum víða um land. Nú er fjólublái bekkurinn kominn fyrir framan hjúkrunarheimilið og nýtur sín þar vel. Það var vel mætt á fræðsluna og starfsfólk áhugasamt.

Furðuverur tóku á móti syngjandi börnum

Tue, 24 Feb 2026 12:25:00 +0000

Öskudagurinn er ávallt tekinn með trompi í Ási og mikil stemning. Og allir hjálpast að við undirbúninginn. Þaulvön heimiliskona aðstoðaði til dæmis Guðrúnu Lilju við að gera hárið fínt. Börn úr bænum kíktu við og sungu og hittu á ferð sinni um heimilið allskonar furðuverur sem tóku vel á mót börnunum.

Gömlu góðu lögin slá alltaf í gegn

Tue, 24 Feb 2026 11:07:00 +0000

Sönghópurinn Tjaldur kemur reglulega hingað í Ás og syngur með heimilisfólki. Gömul góð lög hljóma og allir taka undir og syngja með. Frábærar stundir með þessum góðu vinum okkar. Takk fyrir komuna og hlökkum til að taka á móti ykkur næst.

Lífssagan mikilvæg

Wed, 11 Feb 2026 13:58:00 +0000

Þegar fólk flytur á Grundarheimilin er afar hjálplegt að fá upplýsingar um heimilismanninn sem veita innsýn í líf hans áður en flutt var á Grund, Mörk eða í Ás. Oft er minnið farið að svíkja þegar flutt er á hjúkrunarheimili og þá er frábært fyrir starfsfólk að geta flett myndaalbúmi þar sem svipmyndum er brugðið upp af ævi viðkomandi með texta þar sem fram koma nöfn fólks sem er á myndum og skyldleiki eða frekari upplýsingar um það sem myndin hefur að geyma. Þannig getur ágrip af sögu heimilismanns oft verið kveikja að umræðum og starfsmenn geta kynnst heimilismanninum ögn betur en ella með því að sjá myndir af honum frá liðnum árum eða fjölskyldunni. Hvaðan er hann, hverjir skipta hann máli, hver var starfsvettvangur, hvaða áhugamál hafði hann og svo framvegis. Veggspjald hefur reynst vel Líklega miklar fólk stundum fyrir sér að útbúa lífssögu.+Á netinu er hægt að útbúa skemmtilegar myndabækur. En veggspjöld eru líka viðráðanleg og oft eru skemmtilegustu lífssögunar einmitt þannig. Þá er hægt að ljósrita myndir úr ævi heimilismanns og líma á veggspjald með stuttum texta. Við heyrðum sögu frá fjölskyldu eins heimilismanns. Barnabörnin fengu það hlutverk að útbúa lífssögu ömmu til að hengja upp á vegg. Börnin áttu dýrmætar stundir með ömmu sem rifjaði upp með þeim gamla tíma og afraksturinn varð persónulegt veggspjald um ömmu. Tilvalið er svo að leyfa veggspjaldinu að hanga uppi á vegg í herbergi ömmu eða afa. Við fengum góðfúslegt leyfi til að birta hér nokkur dæmi um hvernig hægt er að útbúa svona veggspjöld eða síður í albúm.

Bygging hjúkrunarheimilis í Ási er á áætlun

Wed, 21 Jan 2026 09:41:00 +0000

Framvinda byggingar hjúkrunarheimilisins í Ási gengur vel og er verkið á áætlun en hjúkrunarheimilið í Ási er eitt þriggja heimilanna sem er undir hatti Grundarheimilanna. Gísli Páll Pálsson, stjórnarformaður Grundarheimilanna, segir að þessa dagana sé verið að reisa veggi fjórða og síðasta hlutans sem er að austanverðu. "Búið er að steypa þakplötu á hina þrjá hlutana og hiti kominn á þá. Frágangi þaks á fyrsta húsi að vestanverðu er lokið að fullu og þar með talið að hífa úthagatorf á þakið. Það hefur hjálpað verulega til hversu tíðarfarið hefur verið gott í vetur en ekki síður að Húsvirki sem er verktaki verksins hefur staðið sig mjög vel. Forsteyptar einingar eins og húsið er byggt úr hefur stytt byggingartímann verulega og hefur húsið risið á undrafljótan hátt."

Tilkynning vegna tölvuárásar á Grundarheimilin

Fri, 12 Dec 2025 19:26:00 +0000

Þessi tilkynning er send til núverandi og fyrrverandi íbúa Grundarheimilanna (Grund, Mörk og Ás), aðstandenda íbúa, skjólstæðinga, umsækjenda og íbúa í íbúðum 60+ í Mörkinni, starfsfólks Grundarheimilanna sem og verktaka sem starfa eða hafa starfað fyrir heimilin. Líkt og fram hefur komið í fjölmiðlum urðu Grundarheimilin fyrir fjandsamlegri tölvuárás. Árásin fólst í því að tölvuþrjótar brutust inn á netþjóna og komust þannig inn í kerfi þar sem finna má upplýsingar um núverandi og fyrrverandi íbúa, aðstandendur, skjólstæðinga, starfsfólk og verktaka heimilanna. Búið er að loka fyrir aðgang tölvuþrjótanna og ljóst þykir að engum gögnum eða upplýsingum hefur verið eytt eða þeim breytt. Heimilin hafa áfram fullan aðgang að öllum upplýsingum sem kerfin innihalda og árásin hefur því takmörkuð áhrif haft á þá þjónustu sem heimilin veita íbúum og skjólstæðingum. Rannsókn hefur þó leitt í ljós að áður en að tölvuárásin uppgötvaðist tókst tölvuþrjótunum að afrita hluta af þeim upplýsingum sem finna mátti í kerfum heimilanna. Þær persónuupplýsingar sem vitað er á þessari stundu að afritaðar voru eru eftirfarandi, um eftirfarandi flokka einstaklinga: Skjólstæðingar, íbúar og aðstandendur • tengiliða- og samskiptaupplýsingar skjólstæðinga, íbúa og aðstandenda, • upplýsingar um greiðslur skjólstæðinga og íbúa, • heilsufarsupplýsingar sem tengjast umönnun, • upplýsingar sem tengjast veittri heilbrigðisþjónustu á heimilunum, s.s. vegna lyfjagjafa, skráningu á rannsóknarniðurstöðum, læknabréfum og viðtölum og • upplýsingar um óvænt atvik (eftir því sem við á). Íbúar og umsækjendur um íbúðir 60+ í Mörkinni og aðstandendur • tengiliða- og samskiptaupplýsingar og • upplýsingar um greiðslur íbúa. Starfsfólk og fyrrverandi starfsfólk • samskipta- og tengiliðaupplýsingar, • bankaupplýsingar, • upplýsingar um lífeyris- og stéttafélagsaðild og • launaupplýsingar. Verktakar • samskipta- og tengiliðaupplýsingar, • reikningsupplýsingar og • afrit af reikningum. Ekkert bendir til þess að þessar upplýsingar hafi verið birtar og tölvuþrjótarnir hafa ekki hótað slíkri birtingu. Rannsókn árásarinnar stendur enn yfir með aðstoð færustu sérfræðinga landsins á þessu sviði. Í ljósi viðkvæms eðlis þessara upplýsinga eru viðtakendur hvattir til að vera á varðbergi gagnvart mögulegri misnotkun á upplýsingunum af hálfu tölvuþrjótanna. Ef grunur vaknar um slíka misnotkun þá skal gæta fyllstu varúðar í samskiptum, bregðast ekki við, heldur láta okkur vita eða tilkynna um atvikið til CERT-IS netöryggissveitarinnar. Rétt er að árétta að Grundarheimilin munu ekki senda út neina pósta að fyrrabragði þar sem fólk er beðið um að senda upplýsingar eða ýta á hlekki. Rætt verður við alla íbúa Grundarheimilanna og þeir upplýstir um stöðu málsins. Við höfum opnað fyrir sérstakan upplýsingasíma ef einhverjar spurningar vakna. Fulltrúi Grundarheimilanna svarar í síma 530-6200 og í gegnum netfangið personuvernd@grund.is. Síminn er opinn frá kl. 10 til 14 næstu daga. Búið er að tilkynna um árásina til Persónuverndar, Landlæknis og CERT-IS netöryggissveitarinnar í samræmi við það sem áskilið er í lögum og starfsleyfi heimilanna. Einnig er verið að undirbúa kæru til lögregluyfirvalda. Grundarheimilin munu halda viðtakendum upplýstum eftir því sem málinu vindur fram. Við þökkum fyrir skilninginn á meðan við komumst til botns í málinu. Karl Óttar Einarsson, forstjóri Grundarheimilanna

Tölvuárás á Grundarheimilin

Wed, 10 Dec 2025 13:04:00 +0000

Takmarkað netaðgengi er á Grundarheimilunum í varúðarskyni vegna tölvuárásar sem uppgötvaðist síðdegis í gær. Áhrifa þessa gætir einnig á símkerfi og tölvupóst. Unnið er að því með færustu sérfræðingum að leita að uppruna árásarinnar og koma kerfunum upp að nýju í forgangsröð út frá mikilvægi. Reikna má með að áhrifin verði a.m.k. einhver næstu daga. Þá er unnið að því að tilkynna málið til opinberra aðila, s.s. Persónuverndar, Cert-IS og Embætti landlæknis. Við höfum sent aðstandendum upplýsingar á sms eins og við höfum getað, það kann að vera að einhverjir hafi fengið skilaboð sem að ekki eru lengur aðstandendur hjá okkur. Við biðjumst velvirðingar á því. Við munum halda aðstandendum upplýstum eftir því sem málið þróast.

Jólakransar á aðventu

Wed, 03 Dec 2025 09:13:00 +0000

Það er hefð fyrir þvi að útbúa fallega jólakransa á aðventunni hér í Ási. Heimilismenn hittust nýlega til að útbúa kransa og ýmiskonar jólaskraut til að skreyta með hér í Ási. Eins og alltaf var andrúmsloftið létt og kátt

Tónlistarbingó vinsælt

Tue, 21 Oct 2025 07:48:00 +0000

Það er alltaf gaman þegar tónlistarbingó er á dagskrá hér hjá okkur í Ási. Eins og ávallt var vel mætt og andrúmsloftið létt og skemmtilegt.

Gott að eldast í Hveragerði

Wed, 27 Aug 2025 20:11:00 +0000

Í dag hafa Heilbrigðisstofnun Suðurlands og Hveragerðisbær gert samning við Ás hjúkrunarheimili um samþætta heimaþjónustu við íbúa í Hveragerði frá 1. september nk. Verkefnið er tilraunaverkefni sem að byggist á aðgerðaráætlun Gott að eldast sem að er samstarfsverkefni milli Félags- og húsnæðismálaráðuneytis og Heilbrigðisráðuneytis. Ás mun þannig sinna heimahjúkrun og félagslegum heimastuðningi við íbúa Hveragerðisbæjar 60 ára og eldri sem sækja um og fá samþykkta slíka þjónustu. Áður hefur í Ási verið starfrækt dagdvöl ásamt því að þaðan hafa íbúar Hveragerðisbæjar sem óskað hafa eftir fengið mat sendan heim.

Hélt tónleika í Ásskála

Fri, 22 Aug 2025 10:13:00 +0000

Guðný Alma, sem er sumarstarfsmaður hér hjá okkur í Ási, söng fyrr í sumar fyrir heimilismenn í Bæjarási. Nýlega mætti hún aftur og söng við undirleik unnusta síns Péturs Nóa Stefánssonar. 🥰 Að þessu sinni söng hún fyrir heimilismenn í Ásskála. Viðtökurnar voru frábærar enda syngur Guðný Alma eins og engill. 👏

Tónlistarbingó sló í gegn

Thu, 21 Aug 2025 11:36:00 +0000

Bingó er alltaf vinsælt og flestir spenntir að taka þátt. Heimilismenn á hjúkrunarheimilinu voru yfir sig hrifnir af tilbreytingunni þegar boðið var upp á tónlistarbingó. 🥰 Það er eflaust stutt í að aftur verði boðið upp á bingó þar sem tónlist kemur við sögu.

Færðu Heilsustofnun tvö eplatré

Mon, 18 Aug 2025 20:55:00 +0000

Heilsustofnun í Hveragerði fagnaði 70 ára afmæli á dögunum. Forsvarsmenn Grundarheimilanna mættu í afmælishófið og færðu Heilsustofnun tvö eplatré að gjöf. Á myndinni eru frá vinstri Ingi Þór Jónsson markaðsstjóri Heilsustofnunar, hjónin Gísli Páll Pálsson stjórnarformaður Grundarheimilanna og Alda Pálsdóttir framkvæmdastjóri Íbúða 60+ í Mörk, Þórir Haraldsson forstjóri Heilsustofnunar og Karl Óttar Einarsson forstjóri Grundarheimilanna.

Sumarstarfsmaður bauð upp á tónleika

Thu, 24 Jul 2025 14:01:00 +0000

Guðný Alma er sumarstarfsmaður í Bæjarási. Í vikunni kom hún ásamt unnusta sínum, Pétri Nóa Stefánssyni, og hélt tónleika fyrir okkur. Ljúfir og notalegir tónleikar. Takk innilega fyrir okkur

Ýmislegt bardúsað í góða veðrinu

Wed, 16 Jul 2025 11:02:00 +0000

Hér í Ási höfum við nýtt góða veðrið að undanförnu og bardúsað ýmislegt. Einn daginn fórum við og tíndum falleg blóm í Hverahlíðinni og fórum svo í gegnum Ásbyrgi. Við enduðum daginn á að fá okkur Gatorade til að fylla á söltin í hitanum og bjuggum til keilu úr flöskunum. Virkilega góður dagur og allir sáttir í þessu dásamlega veðri.

Litríku sumarblómin sett niður

Mon, 23 Jun 2025 08:49:00 +0000

Samvinna var lykilorðið þegar kom að því að setja niður sumarblómin í Bæjarási. Heimilisfólk ásamt starfsfólki úr iðjunni tók höndum saman og sá til þess að litrík sumarblómin blasa nú við þegar gengið er út á veröndina.

Gáfu heimilisfólki Grundarheimilanna konfekt fyrir 17. júní

Fri, 13 Jun 2025 13:37:00 +0000

Það er gaman að segja frá því að fulltrúar frá Nói Síríus höfðu samband og spurðu hvort ekki mætti gleðja heimilisfólk Grundarheimilanna með konfekti á 17. júní. 🌰 Því var að sjálfsögðu vel tekið og í morgun fengu öll heimilin þrjú svona sendingu, Grund, Mörk og Ás. Takk kærlega fyrir að hugsa svona fallega til okkar og hér verður sko boðið upp á konfekt með kaffinu á þjóðhátíðardaginn, þökk sé Nóa Síríus. 🇮🇸

Gengið í góða veðrinu

Tue, 20 May 2025 08:12:00 +0000

Mánudagsgöngurnar eru hafnar á ný í Ási og það var ekki amalegt að byrja á ný í átján gráðu hita og glampandi sól. Að þessu sinni var kíkt á framkvæmdirnar vegna nýja hjúkrunarheimilisins.

Fagnaði aldarafmæli

Thu, 08 May 2025 12:03:00 +0000

Það var mikið um dýrðir í gær í Ási þegar heimilismaðurinn Guðjón Jónsson fagnaði aldar afmæli. Ættingjar og vinir komu færandi hendi með árnaðaróskir, blómvendi og gjafir og starfsfólk sem og Gísli Páll Pálsson, stjórnarformaður Grundarheimilanna kom og heilsaði upp á afmælispiltinn. 🌹🌹 Rúsínan í pylsuendanum var svo þegar börn úr fjórða bekk í grunnskólanum í Hveragerði komu stormandi á hjúkrunarheimilið og sungu fyrir afmælisbarnið. 🥰 Til hamingju Guðjón. Það er merkur áfangi að fagna aldarafmæli.

Fyrsta skóflustungan tekin að nýju hjúkrunarheimili í Ási

Fri, 02 May 2025 16:36:00 +0000

Það eru Grundarheimilin sem byggja hjúkrunarheimilið og leigja ríkinu með leigusamningi til 20 ára. Grund hefur rekið Ás frá árinu 1952 og sinnt öldrunarþjónustu í Hveragerði og nágrenni í yfir sjötíu ár. Það voru Inga Sæland, félags- og húsnæðismálaráðherra, Birna Sif Atladóttir, framkvæmdastjóri hjúkrunar í Ási, og Grétar Aðalsteinsson, heimilismaður í Ási, sem tóku skóflustungu að nýja heimilinu sem mun rúma 44 manns. Í dag eru heimilismenn í Ási 111 talsins en verða 138 þegar nýja hjúkrunarheimilið verður tekið í notkun. Til að koma byggingunni fyrir þarf að fjarlægja nokkur minni hús á staðnum með eldri rýmum og sameiginlegum baðherbergjum. Öll herbergin á nýja hjúkrunarheimilinu verða einbýli með baðherbergjum. Byggingin verður 2.680 fermetrar og heildarkostnaður um 2,8 milljarðar króna. „Það er mér sönn ánægja að taka fyrstu skóflustunguna að nýju hjúkrunarheimili í því ágæta sveitarfélagi Hveragerði. Þessi framkvæmd bæði fjölgar hjúkrunarrýmum og leysir af hólmi eldri rými sem voru komin til ára sinna. Ég óska Hvergerðingum innilega til hamingju með þetta og við munum halda áfram á sömu braut á landsvísu eins og ríkisstjórnin hefur lofað,“ sagði Inga Sæland, félags- og húsnæðismálaráðherra. „Þessi framkvæmd er mjög mikilvæg til að koma til móts við breyttar og auknar þarfir og kröfur þeirra sem dvelja nú og munu dvelja framvegis á hjúkrunarheimilum landsins. Allir verða með sitt eigið herbergi og sér baðherbergi. Húsið samanstendur af fjórum 11 manna einningum og er skjólsæll garður á milli austureininganna annars vegar og einnig á milli vestureininganna. Aðalinngangur er í miðju og tengjast einingarnar fjórar um gang að norðanverðu þar sem einnig verða ýmis stoðrými. Við á Grundarheimilunum erum afar þakklát félags- og húsnæðismálaráðherra að treysta okkur fyrir þessu góða verkefni,“ sagði Gísli Páll Pálsson, stjórnarformaður Grundarheimilanna. „Starfsemin í Ási er ein af perlum bæjarins og er sannarlega hluti af einstökum gæðum Hveragerðis. Nýtt hjúkrunarheimili er hluti af metnaðarfullri framtíðarvegferð Áss, sögulegri uppbyggingu Hveragerðisbæjar og mun auka við gæði og velferð í bæjarfélaginu,“ sagði Pétur Georg Markan, bæjarstjóri í Hveragerði.