Grund | Grundarheimilin

Opið hús í Ási

Mon, 27 Jul 2026 12:43:00 +0000

Fjölmargir lögðu leið sína á opið hús á afmælisdegi Áss í gær þegar gefinn var kostur á að skoða nýja hjúkrunarheimilið sem er að rísa. Gestum var boðið upp á kaffi og kleinur og fengu leiðsögn um þetta glæsilega heimili sem stefnan er að opna í febrúar á næsta ári.

Opið hús sunnudaginn 26. júlí

Wed, 22 Jul 2026 10:49:00 +0000

Í tilefni af 80 ára afmæli Hveragerðisbæjar og 74 ára afmæli Áss verður nýja hjúkrunarheimilið sem rís norðan Hverahlíðar opið gestum sunnudaginn 26. júlí frá 14.00 – 17.00. Boðið verður upp á kaffi og kleinur. Allir velkomnir Gísli Páll stjórnarformaður Grundarheimilanna

Á Grund er íslenska fjölskyldan mín

Wed, 22 Jul 2026 08:08:00 +0000

Á Grund vinnur frábært starfsfólk frá ýmsum þjóðlöndum. Ángel er frá Venesúela og hún hefur að undanförnu verið iðin við að skreyta veggina á Litlu og Minni Grund og virkjað heimilisfólkið með sér. „Mér finnst gaman að gleðja heimilisfólkið sem hefur gefið mér svo mikið. Ástúð, góðvild, bros og faðmlög er það sem mætir mér hér í vinnunni. Heimilisfólkið er duglegt að kenna mér íslensku og það má alveg segja að þetta er íslenska fjölskyldan mín, heimilisfólk og starfsfólk á Litlu og Minni Grund. Við erum frá ýmsum þjóðlöndum sem hér störfum og um daginn útbjó ég með aðstoð heimilisfólks veggspjald með þjóðfánum okkar allra.“ Ángel segist alltaf hafa haft gaman af því að skapa og hún er með hjálp heimilisfólks að búa til fiðrildi, blóm og allskonar skraut sem þau hengja upp á veggi. Í Venesúela skreytti hún gjarnan kennslustofurnar líka en hún er kennari að mennt. Eiginmaður hennar og sonur komu með henni hingað til lands í leit að betri framtíð. Sonur hennar Isaac stundar nú nám í Hagaskóla, spilar á gítar, ber út dagblöð og vinnur við garðyrkju í sumar. Hann spilar líka fótbolta og eiginmaðurinn Luis vinnur í fiskbúð í Hafnarfirði. Þau eru alsæl hér á landi og Ángel segist hamingjusöm að fá að vera nálægt frábæru fólk á Litlu og Minni Grund.

Lúðrasveit í heimsókn

Wed, 15 Jul 2026 16:07:00 +0000

Þau lífguðu aldeilis upp á hversdaginn hér á Grund krakkar úr vinnuskólanum sem komu til okkar á Hringbrautina og spiluðu fyrir heimilisfólk. Það blés svolítið svo flestir horfðu út um gluggann á þessa hressu krakka en nokkrir létu sig hafa það og fóru út. Hópurinn fer víða og gleður gesti og gangandi með lúðrasveitarhljómum. Frábær heimsókn. Takk fyrir komuna.

Áttum fimm fulltrúa við útskrift um síðustu helgi

Tue, 23 Jun 2026 11:17:00 +0000

Við á Grundarheimilunum eru stolt að segja frá því að við áttum fimm fulltrúa við útskriftina hjá Háskólanum á Akureyri um síðustu helgi. Hasthika Lankathilaka starfsmaður á Grund og Maria Florinda Da Silva Abranja starfsmaður á hjúkrunardeildinni í Ási luku grunndiplómu í fagnámi fyrir starfandi sjúkraliða með sérhæfingu í öldrunar- og heimahjúkrun. Ragnhildur Rún Vilmundardóttir brautskráðist með BS gráðu í iðjuþjálfunarfræðum. Fanney Björg Karlsdóttir og Guðrún Lilja Jóhannsdóttir brautskráðust með viðbótardiplómu í ráðgjöf í málefnum fólks með heilabilun. Við óskum þeim hjartanlega til hamingju.

Hátt á annað þúsund pönnukökur

Tue, 16 Jun 2026 12:58:00 +0000

Klukkan átta í morgun mættu þeir Ingvar Már yfirmatreiðslumeistari Grundarheimilanna og Benidikt bakari í eldhúsið í Mörk til að baka fyrir morgundaginn, 17. júní. Alls baka þeir á um tíu pönnukökupönnum um 1.700 pönnukökur sem heimilisfólk, starfsfólk og íbúar hjá Íbúðum 60+ fá að gæða sér á eftir matinn eða með kaffinu á morgun. Þeir búast við að klára baksturinn um hálfþrjú í dag

Sprækar í sjúkraþjálfun

Fri, 12 Jun 2026 12:09:00 +0000

Það er alltaf nóg um að vera í sjúkraþjálfuninni á Grund. Hér eru það æfingar með þessum heiðurskonum. Góða helgi.

Vortónleikar Grundarkórsins

Fri, 12 Jun 2026 09:30:00 +0000

Það voru gamlir og góðir sumarsmellir í bland við önnur lög sem ómuðu úr hátíðasal Grundar þegar Grundarkórinn hélt vortónleika sína nú í vikunni. Kórinn er nú kominn í sumarfrí og í haust byrja vikulegar æfingar aftur. Þá eru eins og endranær aðstandendur hjartanlega velkomnir í kórinn sem og starfsfólk og velunnarar heimilisins.

Tónlist í umönnun á Grundarheimilunum

Tue, 19 May 2026 12:57:00 +0000

"Það hefur sýnt sig að tónlist eykur vellíðan fólks og þegar við erum að tala um fólk með heilabilun eykurtónlist einnig virkni og minnkar depurð,“ segir Magnea Tómasdóttir,söngkona og tónlistarkennari í viðtali í Morgunblaðinu í morgun. Grundarheimilin hlutu styrk frá Oddfellowsystrum í Rebekku stúku nr. 1, Bergþóru til að gera átak í að upplýsa um hvernig hægt er að nota tónlist í umönnun með stórkostlegum árangri. Meðal þess sem Magnea gerir er að halda fyrirlestra fyrir starfsfólk Grundarheimilanna og aðstandendur um notkun tónlistar í daglegu lífi.

Fjör í hátíðasal

Wed, 06 May 2026 09:43:00 +0000

Mánaðarlega kemur Grundarbandið í heimsókn hingað á Grund og heldur uppi fjöri í hátíðasalnum. Þá er stiginn dans og mikið fjör. Þeir sem ekki eiga auðvelt með að dansa sitja bara í sætum sínum og dilla sér með.

Nýbakaðar vöfflur á Kaffi Grund

Fri, 01 May 2026 08:21:00 +0000

Síðasta miðvikudag í hverjum mánuði liðast þessi líka dásamlegi vöffluilmur um fyrstu hæð Grundar því þá eru til sölu á Kaffi Grund nýbakaðar vöfflur með kaffinu. Aðra daga er selt allskonar kruðerí með kaffinu og einnig smurt brauð og croissant. Við hvetjum aðstandendur til að koma með fólkinu sínu á kaffi húsið og núna þegar fer að hlýna þá er um að gera að sitja í garðinum og leyfa ungviðinu að leika sér úti. Að lokum minnum við á að það er opið á Kaffi Mörk frá 12:00 til 17:00 alla virka daga og frá 13:00 til 17:00 um helgar.

Peysufatadagurinn á Grund

Fri, 27 Mar 2026 08:03:00 +0000

Árlega gleðja nemendur Kvennaskólans okkur með heimsókn á peysufatadaginn og það ríkir ávallt mikil tilhlökkun að fá hópinn í heimsókn. Heimilisfólk raðar sér í gluggana þegar nemendur mæta syngjandi og dansandi í portið og sumir klæða sig vel og koma út og fylgjast með. Oftar en ekki eiga einhverjir nemendur ömmu, afa eða langömmu og langafa hér á heimilinu sem bíða spennt eftir að sjá afkomendur sína uppáklædda með þessum hætti. Við hér á Grund erum þakklát fyrir að Kvennaskólinn hafi heimsókn á heimilið á dagskrá á peysufatadaginn. Takk innilega fyrir okkur.

Gáfu Grund tvær loftdýnur

Fri, 20 Mar 2026 14:00:00 +0000

Hjónin Kristín Jóna Grétarsdóttir og Baldvin Bjarnason reka Títus ehf. Þau gáfu Grund nýlega tvær loftdýnur í minningu Sólveigar Jónsdóttur, móður Kristínar, sem bjó á Grund síðustu fjögur æviárin. Sólveig hafði unnið í eldhúsinu á Grund þegar hún var ung og hætti þegar hún eignaðist Kristínu. Við þökkum hjartanlega fyrir þessa hugulsömu gjöf sem mun koma sér ákaflega vel hér á Grund.🥰 Á myndinni eru frá Grund Oxana, Sigrún, Svanur, Thuy og Elísabet og Kristín eigandi Títus.

Salsatónlistin ómar á Grund

Thu, 12 Feb 2026 19:58:00 +0000

Tvisvar í mánuði ómar salsatónlist á Grund. Það er þegar gleðigjafinn og sjálfboðaliðinn Zulay Viciet mætir í hús. Hún er dansþerapisti frá Venezuela sem dansar við dunandi salsatónlist og fær okkur öll til að dansa með hvort sem við erum sitjandi eða getum staðið í fæturna. Takk kæra Zulay fyrir að koma til okkar á Grund með birtu, yl og umfram allt gleðina.

Lífssagan mikilvæg

Wed, 11 Feb 2026 13:58:00 +0000

Þegar fólk flytur á Grundarheimilin er afar hjálplegt að fá upplýsingar um heimilismanninn sem veita innsýn í líf hans áður en flutt var á Grund, Mörk eða í Ás. Oft er minnið farið að svíkja þegar flutt er á hjúkrunarheimili og þá er frábært fyrir starfsfólk að geta flett myndaalbúmi þar sem svipmyndum er brugðið upp af ævi viðkomandi með texta þar sem fram koma nöfn fólks sem er á myndum og skyldleiki eða frekari upplýsingar um það sem myndin hefur að geyma. Þannig getur ágrip af sögu heimilismanns oft verið kveikja að umræðum og starfsmenn geta kynnst heimilismanninum ögn betur en ella með því að sjá myndir af honum frá liðnum árum eða fjölskyldunni. Hvaðan er hann, hverjir skipta hann máli, hver var starfsvettvangur, hvaða áhugamál hafði hann og svo framvegis. Veggspjald hefur reynst vel Líklega miklar fólk stundum fyrir sér að útbúa lífssögu.+Á netinu er hægt að útbúa skemmtilegar myndabækur. En veggspjöld eru líka viðráðanleg og oft eru skemmtilegustu lífssögunar einmitt þannig. Þá er hægt að ljósrita myndir úr ævi heimilismanns og líma á veggspjald með stuttum texta. Við heyrðum sögu frá fjölskyldu eins heimilismanns. Barnabörnin fengu það hlutverk að útbúa lífssögu ömmu til að hengja upp á vegg. Börnin áttu dýrmætar stundir með ömmu sem rifjaði upp með þeim gamla tíma og afraksturinn varð persónulegt veggspjald um ömmu. Tilvalið er svo að leyfa veggspjaldinu að hanga uppi á vegg í herbergi ömmu eða afa. Við fengum góðfúslegt leyfi til að birta hér nokkur dæmi um hvernig hægt er að útbúa svona veggspjöld eða síður í albúm.

Boccia eykur hreyfigetu efri hluta líkamans

Fri, 23 Jan 2026 10:12:00 +0000

Það var notalegt andrúmsloftið á Grund í vikunni þegar þær Anne og Guðbjörg buðu upp á boccia einn morguninn. Boccia hefur fyrir löngu sannað gildi sitt. Leikurinn eykur hreyfigetu í höndum, örmum og efri hluta líkamans. Boccia bætir samhæfingu og jafnvægi, jafnvel þegar setið er og hjálpar til við að viðhalda styrk og liðleika án álags. Boccia þjálfar einbeitingu og stuðlar að því að halda heilanum virkum með taktík og útreikningum.

Tónlist og minnissjúkdómar

Fri, 23 Jan 2026 09:57:00 +0000

Magnea Tómasdóttir og nemendur hennar í Listaháskóla Íslands sem eru að læra um tónlist og minnissjúkdóma bjóða upp á vikulegar stundir fram að páskum. Þetta eru dásamlegar stundir og ekki bara fyrir heimilisfólk heldur líka gefandi fyrir starfsfólk sem sér áhrifin sem tónlist hefur á heimilisfólk.

Bygging hjúkrunarheimilis í Ási er á áætlun

Wed, 21 Jan 2026 09:41:00 +0000

Framvinda byggingar hjúkrunarheimilisins í Ási gengur vel og er verkið á áætlun en hjúkrunarheimilið í Ási er eitt þriggja heimilanna sem er undir hatti Grundarheimilanna. Gísli Páll Pálsson, stjórnarformaður Grundarheimilanna, segir að þessa dagana sé verið að reisa veggi fjórða og síðasta hlutans sem er að austanverðu. "Búið er að steypa þakplötu á hina þrjá hlutana og hiti kominn á þá. Frágangi þaks á fyrsta húsi að vestanverðu er lokið að fullu og þar með talið að hífa úthagatorf á þakið. Það hefur hjálpað verulega til hversu tíðarfarið hefur verið gott í vetur en ekki síður að Húsvirki sem er verktaki verksins hefur staðið sig mjög vel. Forsteyptar einingar eins og húsið er byggt úr hefur stytt byggingartímann verulega og hefur húsið risið á undrafljótan hátt."

Hópstjórar hittast og fræðast

Mon, 22 Dec 2025 08:36:00 +0000

Nýlega hittust hópstjórar Grundar og Markar og áttu saman góðan dag. Boðið var upp á allskonar fræðslu og starfsfólk sammála um að gaman væri að hittast með þessum hætti og kynnast.

Tilkynning vegna tölvuárásar á Grundarheimilin

Fri, 12 Dec 2025 19:26:00 +0000

Þessi tilkynning er send til núverandi og fyrrverandi íbúa Grundarheimilanna (Grund, Mörk og Ás), aðstandenda íbúa, skjólstæðinga, umsækjenda og íbúa í íbúðum 60+ í Mörkinni, starfsfólks Grundarheimilanna sem og verktaka sem starfa eða hafa starfað fyrir heimilin. Líkt og fram hefur komið í fjölmiðlum urðu Grundarheimilin fyrir fjandsamlegri tölvuárás. Árásin fólst í því að tölvuþrjótar brutust inn á netþjóna og komust þannig inn í kerfi þar sem finna má upplýsingar um núverandi og fyrrverandi íbúa, aðstandendur, skjólstæðinga, starfsfólk og verktaka heimilanna. Búið er að loka fyrir aðgang tölvuþrjótanna og ljóst þykir að engum gögnum eða upplýsingum hefur verið eytt eða þeim breytt. Heimilin hafa áfram fullan aðgang að öllum upplýsingum sem kerfin innihalda og árásin hefur því takmörkuð áhrif haft á þá þjónustu sem heimilin veita íbúum og skjólstæðingum. Rannsókn hefur þó leitt í ljós að áður en að tölvuárásin uppgötvaðist tókst tölvuþrjótunum að afrita hluta af þeim upplýsingum sem finna mátti í kerfum heimilanna. Þær persónuupplýsingar sem vitað er á þessari stundu að afritaðar voru eru eftirfarandi, um eftirfarandi flokka einstaklinga: Skjólstæðingar, íbúar og aðstandendur • tengiliða- og samskiptaupplýsingar skjólstæðinga, íbúa og aðstandenda, • upplýsingar um greiðslur skjólstæðinga og íbúa, • heilsufarsupplýsingar sem tengjast umönnun, • upplýsingar sem tengjast veittri heilbrigðisþjónustu á heimilunum, s.s. vegna lyfjagjafa, skráningu á rannsóknarniðurstöðum, læknabréfum og viðtölum og • upplýsingar um óvænt atvik (eftir því sem við á). Íbúar og umsækjendur um íbúðir 60+ í Mörkinni og aðstandendur • tengiliða- og samskiptaupplýsingar og • upplýsingar um greiðslur íbúa. Starfsfólk og fyrrverandi starfsfólk • samskipta- og tengiliðaupplýsingar, • bankaupplýsingar, • upplýsingar um lífeyris- og stéttafélagsaðild og • launaupplýsingar. Verktakar • samskipta- og tengiliðaupplýsingar, • reikningsupplýsingar og • afrit af reikningum. Ekkert bendir til þess að þessar upplýsingar hafi verið birtar og tölvuþrjótarnir hafa ekki hótað slíkri birtingu. Rannsókn árásarinnar stendur enn yfir með aðstoð færustu sérfræðinga landsins á þessu sviði. Í ljósi viðkvæms eðlis þessara upplýsinga eru viðtakendur hvattir til að vera á varðbergi gagnvart mögulegri misnotkun á upplýsingunum af hálfu tölvuþrjótanna. Ef grunur vaknar um slíka misnotkun þá skal gæta fyllstu varúðar í samskiptum, bregðast ekki við, heldur láta okkur vita eða tilkynna um atvikið til CERT-IS netöryggissveitarinnar. Rétt er að árétta að Grundarheimilin munu ekki senda út neina pósta að fyrrabragði þar sem fólk er beðið um að senda upplýsingar eða ýta á hlekki. Rætt verður við alla íbúa Grundarheimilanna og þeir upplýstir um stöðu málsins. Við höfum opnað fyrir sérstakan upplýsingasíma ef einhverjar spurningar vakna. Fulltrúi Grundarheimilanna svarar í síma 530-6200 og í gegnum netfangið personuvernd@grund.is. Síminn er opinn frá kl. 10 til 14 næstu daga. Búið er að tilkynna um árásina til Persónuverndar, Landlæknis og CERT-IS netöryggissveitarinnar í samræmi við það sem áskilið er í lögum og starfsleyfi heimilanna. Einnig er verið að undirbúa kæru til lögregluyfirvalda. Grundarheimilin munu halda viðtakendum upplýstum eftir því sem málinu vindur fram. Við þökkum fyrir skilninginn á meðan við komumst til botns í málinu. Karl Óttar Einarsson, forstjóri Grundarheimilanna