Grund, dvalar- og hjúkrunarheimili

Í lok apríl buðu Svala Sigríður djákni, Dragana og Hófí heimilisfólki á Minni Grund og Litlu Grund upp á vöfflukaffi en mánaðarlega eru þar bakaðar vöfflur í tilefni vinafundanna sem Svala hefur boðið þar upp á. Stundum grípa heimiliskonur í baksturinn og hafa gaman af. Það er alltaf notaleg stemning sem skapast þegar ilmurinn af nýbökuðum vöfflum læðist um húsið. Aðstandendur sem koma í heimsókn fá auðvitað líka nýbakaða vöfflu með kaffinu og einmitt þennan daginn var gestkvæmt hjá fólkinu okkar og því þröng á þingi.

Fyrir skömmu fékk starfsfólkið á Grund góða heimsókn því Hrefna Brynja Gísladóttir iðjuþjálfi á Akureyri var með mjög áhugaverðan fyrirlestur í hátíðasal.  Jane Verity er danskur iðjuþjálfi sem hefur þróað hugmyndafræðina Spark of life eða að vekja lífsneistann. Hrefna Brynja hefur kynnt sér þessi fræði sem gagnast best að nota  með fólki sem komið er með minnissjúkdóma. Gleði og sterkir litir eru áberandi í þessari hugmyndafræði og eftir kennsluna gekk starfsfólkið út með hugmyndir um nýstárlegar aðferðir til að vinna með.